Skoðar sameiningu opinberra hlutafélaga

Erfitt efnahagsástand gæti orðið hvati að sameiningu Keflavíkurflugvallar ohf. og Flugstoða ohf. Þetta kom fram í máli Kristjáns L. Möller samgönguráðherra þegar Keflavíkurflugvöllur ohf. tók formlega við rekstri flugvallarins á föstudag.

Keflavíkurflugvöllur ohf. tekur við rekstri Keflavíkurflugvallar og Flugstöðvar Leifs Eiríkssonar.

Kristján sagði í samtali við Fréttablaðið að nú sé unnið að því að skipa starfshóp sem kanna eigi mögulega sameiningu þessara tveggja opinberu hlutafélaga sem heyra undir samgönguráðuneytið. Lögð sé mikil áhersla á að hraða þeirri vinnu.

Keflavíkurflugvöllur ohf. mun ekki fá til eignar mannvirki sem kostuð voru af mannvirkjasjóði Atlantshafsbandalagsins (NATO). Hugmyndir voru uppi í samgönguráðuneytinu um að verðmæti þessara eigna yrðu metin og færð til félagsins til að lagfæra erfiða eiginfjárstöðu í stofnefnahagsreikningi þess.

Því var harðlega mótmælt af fulltrúum utanríkisráðuneytisins. Samkvæmt heimildum Fréttablaðsins var bent á að yrðu verðmætin metin og færð félaginu til eignar myndi NATO eignast samhljóðandi kröfu á stjórnvöld.

Samgönguráðherra og utanríkisráðherra skrifuðu á gamlársdag undir viljayfirlýsingu um að Keflavíkurflugvöllur ohf. fái afnot af mannvirkjum kostuðum af NATO, svo sem flugbrautum. Forstjórum Varnarmálastofnunar og Keflavíkurflugvallar ohf. hefur verið falið að semja um útfærsluna, segir Kristrún Heimisdóttir, aðstoðarmaður utanríkisráðherra.

Kristján segir að þarna sé um formbreytingu að ræða, ekki standi til að færa eignir beint inn í nýtt félag.

Fram kom í minnisblaði samgönguráðuneytisins, sem Fréttablaðið hefur undir höndum, að stofnefnahagsreikningur Keflavíkurflugvallar ohf. standi illa. Annað af tvennu þurfi að koma til, aukið hlutafé frá ríkinu eða að það leggi félaginu til eignir að andvirði um fimm milljarða króna.

Kristján segir vinnu við stofnefnahagsreikning félagsins í gangi, en þeirri vinnu ljúki ekki fyrr en eftir uppgjör flugvallarins. Spurður hvort til standi að færa félaginu til tekna eignir greiddar af NATO, eða leigu af þeim, segir hann að svör við slíkum spurningum verði að bíða þar til stofnefnahagsreikningur verði kynntur.

brjann@frettabladid.is