Málflutningi lokið í máli Jóns Ásgeirs

Fyrir stundu lauk málflutningi í Héraðsdómi Reykjavíkur í máli sem snýst um kröfu Jóns Ásgeirs Jóhannessonar um að úrskurðað verði að rannsóknin sem fram hefur farið á skattamálinu svokallaða verði dæmd ólögmæt. Gísli Guðni Hall sem flytur málið fyrir Gest Jónsson lögmann Jóns Ásgeirs segir að dómari hafi ekki gefið upp hvenær niðurstöðu sé að vænta í lok þinghalds, en býst við að úrskurður komi fljótlega.

Gísli segir að krafa þeirra sé byggð á því að drátturinn á rannsókninni hafi verið orðinn óheyrilegur og að ekki fáist séð að settur Ríkislögreglustjóri hafi lagt sjálfstætt mat á rannsóknina áður en hann var settur heldur falið öðrum að vinna verkið í sínu umboði.

Björn Bjarnason dómsmálaráðherra setti Rúnar Guðjónsson sýslumann í Reykjavík til þess að vera Ríkislögreglustjóri í meintum skattalagabrotum Jóns Ásgeirs og öðrum tengdum Baugi. Hæstiréttur hafði áður komist að því að Haraldur Johannessen ríkislögreglustjóri skyldi víkja sæti við rannsókn málsins þar sem hann hefði með tilteknum ummælum sínum í fjölmiðlum gert sig vanhæfan til að stjórna rannsókninni.

Ef rannsóknin verður ekki úrskurðuð ólögmæt er varakrafa Jóns Ásgeirs sú Helga Magnúsi Gunnarssyni saksóknara efnahagsbrota, sem sækir málið, verði vikið sæti vegna vanhæfis.

„Það er byggt á því að hann sé vitni í málinu þar sem hann hefur þegar vitnað í málinu og er þannig viðriðinn það. Framganga hans hefur einnig verið með þeim hætti að við teljum það leiða til vanhæfis hafi hann þá einhverntíma verið hæfur," segir Gísli.

Eins og fyrr segir liggur ekki fyrir hvenær niðrustaða í þessari kröfu Jóns Ásgeirs liggur fyrir en Gísli býst við að það verði fljótlega.

„Þeir eru yfirleitt snöggir að úrskurða í málum af þessu tagi."