Mjólkar sig á Hverfisgötu í dag

„Báðir synir mínir fæddust fyrir tímann og þurftu því að dvelja á vökudeild Barnaspítala Hringsins eftir fæðingu. Ég gat ekki tekið þá á brjóst og þurfti því að nota mjaltavél við það. Mér þótti þetta svolítið fjarstæðukennt en á sama tíma fannst mér þetta nokkuð myndrænt og mér datt í hug að nota þessa reynslu í gjörning," segir Katrín I. Jónsdóttir Hjördísardóttir listamaður, sem verður með allsérstakan gjörning á vinnustofu sinni við Hverfisgötu 61 í dag.

Katrín, sem útskrifaðist af myndlistarbraut LHÍ fyrir ári, mun mjólka sig fyrir augum almennings og segist óviss með viðbrögðin sem gjörningurinn mun vekja.

„Það er ósköp eðlilegt fyrir konur að gefa brjóst á almannafæri, en það er eitthvað ónáttúrulegt og óeðlilegt við þetta. Það verður forvitnilegt að sjá hvernig fólk mun taka þessu," segir Katrín.

„Listamenn nýta oft listina til að vekja athygli á samfélagsmeinum og með þessum gjörningi langar mig að vekja athygli á því að mæður fyrirbura neyðast til þess að borga sjálfar leiguna á mjaltavélinni sem getur verið kostnaðarsamt."

Gjörningurinn hefst klukkan 13.00 og verður endurtekinn klukkan 16.00 í dag. - sm