Íslendingur stoltur af störfum sínum í Simbabve - þar geysar kólerufaraldur

Alþjóðaheilbrigðisstofnunin áætlar að yfir 100.000 manns muni veikjast af kóleru í Simbabve áður en að tilfellum fari að fækka og að kóleran muni geysa að minnsta kosti í þrjá mánuði í viðbót. Horfur eru slæmar vegna regntímans og slæmrar salernis- og vatnsaðstöðu.

„Hér er mikill viðbúnaður alþjóðasamfélagsins og eru t.d. enn hér sjö Rauða kross landsfélög með neyðarteymi vegna kólerunnar. Nú hafa 60.000 manns veikst og um 4.000 dáið," segir Hildur Magnúsdóttir hjúkrunarfræðingur á vef Rauða krossins. Þar segir hún að ljóst sé að aðgerðir samtakanna hafi skilað miklum árangri í að fækka dauðsföllum á svæðinu sem hún starfar. Það heitir Midland og erí miðju landi.

Tveir sendifulltrúar Rauða krossins starfa neyðarteymum vegna kóleru í landinu. Hjúkrunarfræðingarnir Hildur og Maríanna Csillaq héldu til Simbabve um miðjan janúar til að taka þátt í neyðaraðgerðum Rauða krossins vegna kólerufaraldurs í landinu. Þær starfa með neyðarteymum norska og finnska Rauða krossins.

Dauðsföllum hefur fækkað

„Ég var að koma úr ferð um norðurhluta héraðsins Gokwe sem ég starfa í. Það er afskekkt sveitahérað þar sem fólk drekkur vatn úr óhreinum ám eða regnvatn úr jörðu. Margir hafa þó aðgang að hreinu vatni en þurfa langt að sækja það í sumum tilfellum," segir Hildur og bætir við að aðeins um 5% fólks í héraðinu hafi salerni. Slæmur aðbúnaður er tilkominn vegna þess hve allir innviðir hafa veikst síðastliðin ár en líka sökum fáfræði, að mati Hildar.

Aðalmálið er þó að dauðsföllum hefur snarfækkað eftir að við hófum stuðninginn, segir Hildur. „Aðgengi fólks að réttri og hraðri meðferð, þá helst að salt- sykurduftblöndu sem leyst er upp í hreinu vatni, er fyrst og fremst að þakka. Fólk deyr einfaldlega úr þurrki svo mikill er niðurgangurinn og uppköstin."



Hreykin af því að vera hjúkrunarfræðingur

„Ég er hreykin af því að vera hjúkrunarfræðingur því það eru þeir sem standa vaktina á þessum afskekktu svæðum dag og nótt, launalausir í algjöru aðstöðuleysi og setja sjálfa sig í hættu. Það er leitt hve lítið fé fæst til aðstoðar í Simbabve því það er virkilega þörf fyrir stuðning í þessu landi þar sem innviðir hafa hrunið, skortur er á mat og atvinnuleysi er 95%."