Álfheiður Ingadóttir: Vítavert ekki viðeigandi orð í þessu samhengi

„Það hafa allir forsetar sitt mat á þessu, það er engin ein regla sem gildir þar," segir Álfheiður Ingadóttir, fimmti varaforseti Alþingis um athugasemd sína við orðaval þingmanns í gær.

Hún hvatti Tryggva Þór Herbertsson, þingmann Sjálfstæðisflokks, til að gæta hófs í orðavali eftir að hann tók sér orðið vítavert í munn.

„Það er meginhlutverk forseta að halda góðri reglu í þingsal og til þess er leikurinn gerður að hafa fundarstjórn," segir Álfheiður og segir alsiða að forsetar beini ábendingum um orðaval til þingmanna.

„Það var auðvitað mitt mat að þetta væri ekki viðeigandi orð í því samhengi sem það var sagt. Ég bað þingmanninn um að gæta hófs og gerði það í tvígang. Hann lét sér ekki segjast og það sýnir kannski muninn á smekk manna."

Hún bendir hins vegar á að orðin víti, ávítur og vítavert hafi sérstaka merkingu gagnvart forseta þingsins.

„Það er mjög mikill munur á því hvort forseti noti það eða einhver annar. Samkvæmt þingsköpum getur forseti sagt að eitthvað sé vítavert ef hann telur að það þurfi að víta þingmann, en það er mjög sjaldgæft. Það á ekkert skylt við það hvernig aðrir horfa á notkun þess orðs, en samkvæmt þingsköpum eru ávítur forseta mjög alvarlegar," segir Álfheiður.

Hún segir langt því frá að hún hafi ávítað eða vítt þingmanninn, heldur hvatt hann í fullri vinsemd til að gæta hófs í orðavali. Hún gerir því athugasemd við fyrirsögn Vísis, „Vítavert" vítavert í sölum alþingis, því samkvæmt þingsköpum sé sú sannanlega ekki raunin.