Dimitar Berbatov: Ég verð að breytast

Dimitar Berbatov, búlgarski framherjinn hjá Manchester United, viðurkennir að hann þurfi að breytast ætli hann að ná að aðlagast leik United-liðsins. Berbatov hefur ekki alveg náð að standa undir 30,75 milljón punda kaupverði sínu frá Tottenham á síðasta ári.

Dimitar Berbatov skoraði aðeins níu mörk fyrsta tímabil sitt með Manchester og hefur aðeins skorað 2 mörk í fyrstu sjö leikjum liðsins á þessu tímabili. "Þetta er mér að kenna en ekki hinum leikmönnunum í liðinu. Ég þarf að breytast," sagði Dimitar Berbatov hreinskilinn.

„Manchester United er þeirra klúbbur og þeir hafa komið frábærlega fram við mig síðan ég kom. Ég var vonsvikinn með fyrsta tímabilið mitt, það var mikil pressa á mér og ég stóð ekki undir henni. Ég verð að sanna mig fyrir stuðningsmönnunum," sagði Berbatov.

„Menn verða að gera sér grein fyrir því að þeir eru vanir Best, Charlton og Cantona en ég er bara Dimitar," sagði Búlgarinn og bætti við: „Ég er búinn að leggja upp mörg mörk en ég þarf að fara að skora mörk líka. Stundum ligg ég andvaka eftir leiki og velti því fyrir mér hvað ég hefði átt að gera frekar," sagði Dimitar.

Berbatov segist vera ánægðari með frammistöðu sína það sem af er á þessu tímabili. „Ég er kominn betur inn í liðið, er sterkari og í betra formi. Ég vildi bara að ég skoraði flerii mörk," sagði Dimitar Berbatov.