Frestun stóriðjuframkvæmda magnar kreppuna

Mikil óvissa ríkir nú um framhald stóriðjuframkvæmda í landinu, bæði vegna ákvörðunar Svandísar Svavarsdóttir umhverfisráðherra, að láta skoða betur hugsanlegt heildstætt umhverfismat vegna háspennulínu til Suðurnesja, og eins vegna fjárlagafrumvarpsins, þar sem boðuð er mikil viðbótarskattheimta á álfyrirtækin landinu. Bæði talsmenn samtaka atvinnulífsins sem og álfyrirtækjanna gefa til kynna í blaðaviðtölum í morgun að þetta muni setja öll áform um frekari uppbyggingu í uppnám.

En hvað myndi það þýða fyrir efnahagslífið?

Þorsteinn Þorgeirsson, skrifstofustjóri efnahagsskrifstofu fjármálaráðuneytisins, segir að ef bæði Helguvík og Straumsvík, ásamt tilheyrandi orkuframkvæmdum, frestist um eitt ár hafi ráðuneytið áætlað að það þýði tveggja prósenta samdrátt landsframleiðslu til viðbótar við það sem áður var áætlað.

Þorsteinn tekur fram að ef einungis yrði um tveggja mánaða töf að ræða myndi það þýða 0,3 prósenta samdrátt. Tveggja prósenta samdráttur myndi hins vegar draga verulega úr tekjum ríkissjóðs og áætlar hann að skatttekjur dragist saman um nær átta milljarða króna á ári. En tekur fram að þá sé miðað við ítrustu áhrif.

Helguvíkurframkvæmdirnar eru þær sem mest munar um og áætlar Þorsteinn að þær séu um þrír fjórðu af heildinni. Stóriðjuframkvæmdirnar eru þannig, að mati fjármálaráðuneytis, taldar geta haft afgerandi áhrif á þjóðin nái að vinna sig úr kreppunni.

"Þetta er það sem við teljum að muni hjálpa okkur mest á næsta ári; að slíkar framkvæmdir komist í gang," segir skrifstofustjóri efnahagsskrifstofu fjármálaráðuneytis.