Ferguson hrósar Wenger á tímamótunum

Sir Alex Ferguson, stjóri Manchester United, hefur háð mörg sálfræðistríðin við Arsene Wenger, stjóra Arsenal í gegnum tíðina en hann er þó alveg tilbúinn að hrósa franska stjóranum fyrir það sem hann hefur gert hjá Arsenal. Wenger er nefnilega orðinn sá stjóri sem hefur setið lengst í sögu Arsenal.

„Arsene hefur náð því besta út úr Arsenal. Liðið hefur náð frábærum árangri síðan að hann kom þangað. Hann er trúr sinni sannfæringu og það eru einnig hans leikmenn," segir Sir Alex Ferguson.

„Það er aðalástæðan fyrir því af hverju hann er búinn að vera svona lengi. Ég las viðtöl við leikmenn hans og þeir sögðust eiga honum allt að þakka. Það er gaman að lesa svoleiðis og ég held að það sé líka mjög lýsandi fyrir hann," sagði Ferguson.

Sir Alex Ferguson er búinn að vera í 23 ár hjá Manchester og segir að árangur Arsene Wenger sanni það hvað menn geta gert þegar þeir fá tíma og þolinmæði hjá félögunum.

„Ef þú lítur á Brian Clough, mig og Arsene, þá sönnum við að það borgar sig að gefa stjórum tíma til að búa til sín lið," sagði Ferguson.

„Lið Wenger spilar skemmtilegan fótbolta og það er fullur völlur í hverri viku. Wenger hefur verið frábær stjóri fyrir þetta fótboltafélag," sagði Ferguson að lokum.