Svalaslys í Ölveri: Óskað eftir úttekt Vinnueftirlitsins

Stjórn Ölvers, sem rekur sumarbúðir KFUM og KFUK, þar sem svalir gáfu undan tuttugu börnum í gærkvöldi með þeim afleiðingum að þau féllu tvo og hálfan metra, segjast harma atvikið. Að auki hefur stjórnin óskað eftir úttekt Vinnueftirlitsins á aðbúnaði sumarbúðanna til að ganga úr skugga um að öll börn njóti fyllsta öryggis í sumarbúðunum.

„Það er mikil Guðsmildi að ekkert barnanna slasaðist alvarlega," segir í tilkynningunni.

Lesa má tilkynninguna í heild sinni hér fyrir neðan:

Stjórn Ölvers, sumarbúða KFUM og KFUK, harmar atvik sem upp kom í ferðalagi í Grundaskóla á Akranesi í gærkvöldi. Það er mikil Guðsmildi að ekkert barnanna slasaðist alvarlega. Lögreglan kannar nú tildrög slyssins.

Stjórn sumarbúðanna hefur ávallt kappkostað að fylgja öllum öryggiskröfum og lagt áherslu á að framfylgja þeim athugasemdum sem fram hafa komið í góðu samráði við eftirlitsyfirvöld. Hefur stjórnin þegar óskað eftir úttekt Vinnueftirlitsins á aðbúnaði sumarbúðanna til að ganga úr skugga um að öll börn njóti fyllsta öryggis í sumarbúðum KFUM og KFUK.

Virðingarfyllst, Gyða Karlsdóttir, Framkvæmdastjóri KFUM og KFUK á Íslandi.