Grétar Sigfinnur: Allir eru með verkefnið á hreinu

„Það eru fimmtán ár síðan við tókum þá síðast hérna svo þetta var kærkomið," sagði Grétar Sigfinnur Sigurðarson, fyrirliði KR, eftir magnaðan 4-2 útisigur liðsins á FH í kvöld.

KR vann FH síðast í Kaplakríka 1994. „Við höfðum trú á verkefninu allan tímann en fengum samt tvö mörk í andlitið snemma leiks. Það var skelfilegur varnarleikur en eftir það fannst mér þetta frábært allan tímann," sagði Grétar.

„Ég er alveg sáttur við varnarleikinn fyrir utan þarna í byrjun og svo var sóknarleikurinn frábær. Gunni (Gunnar Örn Jónsson) brilleraði í þessum leik og Gummi Ben og Bjarni með flotta bolta. Það voru eiginlega allir bara frábærir í dag. Liðið í heildina er skuggalega flott."

„FH er með magnað lið og refsaði þarna fyrir mistök okkar í byrjun. En Evrópudeildin kenndi okkur margt og liðið er orðið miklu betra. Það hafa oft verið flottir leikmenn í KR sem hafa samt ekki verið tilbúnir að gera það sem þarf. Núna eru allir með verkefnið á hreinu," sagði Grétar.