Barcelona ekki á eftir Robinho

Barcelona hefur gefið það út að félagið sé ekki á höttunum eftir Brasilíumanninum Robinho hjá Man. City. Robinho hefur þráfaldlega verið orðaður við liðið síðustu vikur.

Barcelona segir að City hafi sagt þeim að láta leikmanninn í friði í sumar og eftir því hafi félagið farið.

Mark Hughes, stjóri Man. City, segir að Robinho sé í framtíðarhugmyndum félagsins og það sé ekki í myndinni að hleypa honum frá félaginu. Þeim skilaboðum var komið til Barcelona og hefur ekki heyrst í katalónska félaginu síðan.