Carragher: Flott að fá leik gegn United núna

Jamie Carragher, varnarmaður Liverpool, segir að það afar gott að fá leik gegn Man. Utd um helgina. Sigur í slíkum leik geti lyft liðinu aftur upp og komið því á skrið.

„Að sigra United gæti verið sparkið sem við þurfum til að koma til baka. Það er mikill baráttuandi í þessu liði sem og karakter. Við viljum sýna það gegn United og sérstaklega eftir það sem gerðist gegn Lyon," sagði Carragher.

„Við erum að ganga í gegnum erfiðleika en það hefur gerst áður en við munum koma til baka, ég efast ekkert um það. Það er alltaf frábært að mæta United og sigur gegn þeim gæti verið nákvæmlega það sem við þurfum á að halda núna. Sigur myndi lyfta öllum hjá félaginu hátt upp."