Gillett stendur með Benitez

Þrátt fyrir afleitt gengi Liverpool í upphafi leiktíðar þá hefur George Gillett, annar eigandi Liverpool, sent frá sér stuðningsyfirlýsingu til handa Rafa Benitez, stjóra Liverpool.

Ameríkaninn segir að Benitez sé einn af þeim bestu og hefur fulla trú á því að hann muni koma Liverpool aftur á beinu brautina.

„Við erum nýbúnir að gera nýjan langtímasamning við Rafa. Fjölskylda mín er ánægð með hans störf og við teljum hann vera einn af þeim bestu bransanum. Auðvitað er gengið svekkjandi fyrir alla, þar á meðal Rafa. Ég veit að hann er svekktur en við erum öll í þessu saman," segir Gillett en Rafa er með samning til 2014.

Svo er spurning hvernig Benitez tekur þessu en það hefur ekki alltaf þótt gott að fá stuðningsyfirlýsingu frá eigendum því ósjaldan hefur brottrekstur fylgt skömmu síðar.