Capello mun ekki slaka á í landsleikjunum

Fabio Capello mun velja sitt sterkasta lið fyrir síðustu leiki enska landsliðsins í undankeppni HM 2010 þó svo að England sé þegar búið að tryggja sér farseðilinn til Suður-Afríku.

Enska landsliðið hefur unnið alla átta leiki sína til þessa í undankeppninni og voru margir sem áttu von á því að hann myndi nota leikina sem eftir eru til að gefa leikmönnum tækifæri sem minna hafa spilað með landsliðinu.

Svo er ekki, eftir því sem heimildir enskra fjölmiðla herma í dag. England mætir Úkraínu á útivelli þann 10. október næstkomandi og svo Hvíta-Rússlandi heima fjórum dögum síðar.

Úkraín og Króatía eru að berjast um annað sæti riðilsins sem veitir líklega rétt til að taka þátt í umspili um sæti á HM.