Reo-Coker og Keko orðaðir við Arsenal

Nigel Reo-Coker og spænski táningurinn Keko eru í dag orðaðir við Arsenal í enskum fjölmiðlum.

Reo-Coker er sem stendur ekki í náðinni hjá Martin O'Neill, stjóra Aston Villa, og mun vera áhugasamur um að fara aftur til Lundúna en hann hóf feril sinn hjá West Ham. Tottenham mun einnig hafa áhuga á að fá Reo-Coker í sínar raðir.

Keko er sautján ára spænskur sóknarmaður sem leikur með Atletico Madrid. Hann hefur þegar verið kallaður „hinn nýi Fernando Torres". Þrátt fyrir ungan aldur hefur Keko þegar þreytt frumraun sína í spænsku úrvalsdeildinni.

Keko er þó enn of ungur til að skrifa undir atvinnumannasamning við Atletico og er því enn á áhugamannasamningi.