Campbell: Loforð voru svikin

Sol Campbell segir að hann hafi hætt hjá Notts County þar sem forráðamenn félagsins stóðu ekki við gefin loforð.

Campbell gerði fimm ára samning við félagið en var aðeins í 45 daga og náði aðeins að spila í einum leik.

Hann sagðist vera sáttur við að færa sig niður í ensku D-deildina á sínum tíma og að hann væri spenntur fyrir því að taka þátt í metnaðarfulla verkefni sem væri fyrir höndum hjá félaginu.

„Ég vissi að ég yrði fyrsta stóra nafnið sem kæmi til félagsins en ég var fullvissaður um að fleiri myndu fylgja í kjölfarið," sagði Campbell í samtali við News of the World í dag.

„Menn eins og Roberto Carlos og Benjani voru nefndir til sögunnar. En ekkert varð úr því."

„Það eina sem ég er sekur um að hafa tekið þessa menn trúanlega. Ég skammast mín því ekki eða er særður - bara vonsvikinn."

Peter Trembling, framkvæmdarstjóri Notts County, sagði að ummæli Campbell kæmu sér á óvart.

„Við sömdum við níu leikmenn á þremur mánuðum sem enginn hefur gert hjá félagi eins og Notts County. Við erum líka byrjaðir að vinna í nýju æfingasvæði. Við höfum verið orðaðir við um 88 leikmenn."

„En ég ræddi aldrei um Benjani við neinn mann. Mér skilst þó að Sven (Göran Eriksson, yfirmaður íþróttamála) hafi minnst á Roberto Carlos en meira var það ekki. Sven ræðir um 4-5 leikmenn á hverjum degi en flestir eru ekki spenntir fyrir því að spila í D-deildinni."

Hann sagði að Ade Akinbiyi væri á leið til félagsins á morgun og myndi þá gangast undir læknisskoðun.