Könnunin ágætis vísbending

„Þetta er ágætis vísbending og gott að við erum að bæta við okkur," segir Þorgerður Katrín Gunnarsdóttir, varaformaður Sjálfstæðisflokksins, um nýjustu skoðanakönnun fréttastofu Stöðvar 2 og Vísis. Könnunin sýndi að Sjálfstæðisflokkurinn mælist með mest fylgi allra stjórnmálaflokka, en á eftir fylgja Samfylkingin og Vinstri grænir.

Þorgerður segir þetta vera ágætis niðurstöðu, en bendir þó á að mikilvægasta skoðanakönnunin sé kosningarnar sjálfar sem fara fram í apríl. Mikilvægt sé að haldið sé áfram að vinna í efnahagsmálum og að taka á fjármálum ríkisins með þeim hætti sem fyrri ríkisstjórn var þegar byrjuð á. Þorgerður segist þó hafa áhyggjur af því að því að nýja ríkisstjórnin nái ekki að fylgja eftir ýmsum málum. Svörin sem gefin eru séu loðin og skiptar skoðanir í mikilvægum málum. Þorgerður segir að það séu margar erfiðar ákvarðanir sem bíði. Sérstaklega á sviði ríkisfjármála. Ríkisstjórnin þurfi að hafa þor til að taka ákvarðanirnar. Þá þurfi jafnframt að taka til hendinni til þess að örva atvinnulífið. Nýja ríkisstjórnin hefur ekki upp á marga kosti að bjóða í þeim málum að mati Þorgerðar. Hún gagnrýnir sérstaklega afstöðu ríkisstjórnarinnar til hvalveiða.

En Þorgerður segir að jákvæð merki séu á lofti. „Við þurfum að halda áfram að sýna fram á sú efnahagsáætlun sem við lögðum upp með, og þau virðast ætla að fylgja, sé að virka," segir Þorgerður. Hún bendir á að það séu jákvæð teikn á lofti varðandi verðbólguna og efnahagslífið muni batna í kjölfarið á því.