Ari biður griða fyrir Björn Jörund

„Þetta er strákur sem á í vandræðum með vímuefni," segir Ari Matthíasson, fyrrum framkvæmdarstjóri SÁÁ, um fíkniefnahneykslið sem Björn Jörundur lenti í þegar endurrit af samtali hans við dæmdan fíkniefnasala varð opinbert.

Ari, sem nú stefnir á pólitískan frama innan Vinstri grænna, segir það auðvelt, og í raun ódýrt, að vera dómharður gagnvart mönnum sem misstíga sig með þessum hætti.

„Þetta verður eiginlega hjákátlegt," segir Ari og bendir til að mynda á ummæli sem Bubbi Morthens lét falla um málið í gær, en hefur nú beðist afsökunar á.

Ari bendir á hliðstæðu í máli Björns Jörundar og svo þegar Eyþór Arnalds, oddviti sjálfstæðismanna í Árborg, ók drukkinn á ljósastaur um árið. Ari segir að þá hafi margir hneyklast á gjörðum hans, hann spyr á móti: Hversu margir hafa ekið drukknir?

„Sá yðar sem syndlaus er, kasti fyrsta steininum," segir Ari sem telur málið allt hið sorglegasta. Hann segist biðla til almennings að skilja að kannski hafi Birni ekki verið sjálfrátt þegar hann hringdi í fíkniefnasalann.

Hann segist taka það gott og gilt að Björn hafi fullyrt að hann væri búinn að taka á sínum málum í viðtali við Stöð 2 í gærkvöldi.

„En ég biðla bara til almennings að gefa Birni grið," segir Ari skilningsríkur að lokum.