Segist ekki vera dómari í málum bankanna

Ólafur Ragnar Grímsson, forseti Íslands, segist ekki vera dómari í málefnum bankanna. Bloomberg fréttaveitan hefur eftir Ólafi að bankarnir hafi engin lög brotið. Þetta segist Ólafur ekki hafa sagt. Ummæli sín fjalli um að aðrir læri af mistökum bankanna.

Ólafur Ragnar Grímsson, forseti Íslands er í embættiserindum vestanhafs. Hann var í viðtali við útvarpsstöð bloomberg fréttaveitunnar fyrr í dag. Haft er eftir honum á vef fréttaveitunnar, bæði í fyrirsögn og upphafi fréttar að bankarnir hafi engin lög brotið; en sem kunnugt er eru nú til rannsóknar, bæði hjá Sérstökum saksóknara og Fjármálaeftirlitinu, fjölmörg mál sem tengjast bankahruninu. Ólafur segist ekki hafa sagt þetta heldur hafi hann verið að benda á að bankarnir hafi verið hluti af hinu evrópska regluverki. Hluti erfiðleika og áfalla Íslendinga hafi verið að ekki hefði verið nóg aðhald og eftirlit með hinu evrópska regluverki. Í efnahagshruni Íslendinga felist lærdómur, ekki aðeins fyrir Íslendinga heldur líka önnur ríki. Ólafur segist ekki vera dómari í sök bankanna. Það sé enda munur á að tala um evrópska regluverkið og einstök lög í einstökum löndum.

Ólafur Ragnar segir jafnframt að það sé mikilvægt ekki bara fyrir Íslendinga heldur líka fyrir aðrar þjóðir að læra af mistökum bankanna.

Fréttamaður hlustaði á viðtalið við Ólaf Ragnar á Bloomberg, og er heldur frjálslega eftir honum haft í fréttinni. Þetta er ekki í fyrsta sinn sem Ólafur Ragnar hefur þurft að leiðrétta ummæli sín í erlendum fjölmiðlum eftir bankahrunið; raunar er þetta líklega fjórða skiptið. Fjallað var um að forsetinn hefði skammað erlenda sendiherra í Reykjavík eftir hrun. Þá sagði breska ríkisútvarpið frá því í janúar að forsetinn væri að íhuga málsókn vegna hryðjuverkalaga. Þá var haft eftir honum í þýskum fjölmiðlum að ekki ætti að greiða þeim sem lögðu peninga inn á reikninga Kaupþings þar í landi.