Everton bendir fingrinum aftur að Diouf

Talsmaður Everton segir að ásakanir framherjans El-Hadji Diouf hjá Blackburn um að stuðningsmenn Everton hafi beitt hann kynþáttahatri séu ekki til rannsóknar.

Mál er varðar framkomu Diouf í garð boltastráks sem starfaði á leik Everton og Blackburn á sunnudag sé hins vegar inni á borði hjá lögreglunni í Merseyside í Liverpool.

„Við höfum þegar rætt við lögregluna og eina málið sem er verið að rannsaka eftir leikinn er atvik sem átti sér stað á milli Diouf og fjórtán ára gamals boltastráks.

Lögreglan er ekki að rannsaka hegðun stuðningsmanna Everton," er haft eftir talsmanni Everton en Diof hélt því fram í viðtali við Radio Monte Carlo að hann hafi ekkert sagt við boltastrákinn og að stuðningsmenn Everton hafi kastað í sig banönum.