Líklegt að Cole spili með Chelsea í kvöld

Joe Cole er óðum að jafna sig af hnémeiðslum sínum og er líklegt að hann verði í byrjunarliði Chelsea sem mætir QPR í enska deildabikarnum í kvöld.

Hann sleit krossband í hné og hefur verið af þeim sökum frá í átta mánuði. Hann segir að það hafi verið erfitt að vera svo lengi frá.

„Ég hef saknað fótboltans mikið og það hefur verið erfitt að horfa á liðið spila," sagði hann í samtali við The Sun. „En ég er 27 ára og hef mátt upplifa ansi margt á mínum ferli. Mér tókst því að takast á við þessa erfiðleika."

„Fyrir tveimur árum missti ég af heilu tímabili þar sem ég meiddist tvisvar en ég hef aldrei áður verið svona lengi frá í einum rykk."

„En ég áttaði mig á því að ég er heppinn að vera knattspyrnumaður þó svo að ég sé meiddur."

Cole mun nú gera allt sem í hans valdi stendur til að vinna sér sæti í enska landsliðshópnum á ný enda HM í Suður-Afríku á næsta ári.