Graham: Höldum Heiðari vonandi áfram út tímabilið

Framherjinn Danny Graham hjá enska b-deildarfélaginu Watford er gríðarlega ánægður með endurkomu Heiðars Helgusonar til félagsins en Heiðar gerði sér lítið fyrir og skoraði tvennu í endurkomuleik sínum um helgina.

„Vonandi náum við að halda Heiðar hjá Watford út tímabilið. Leikmaður með hans reynslu gæti orðið Watford gríðarlega mikilvægur og hjálpar strákunum í liðinu mjög mikið.

Því fleiri framherja sem við höfum því betra. Það er nauðsynlegt að hafa fjóra til fimm framherja að keppast um stöður í byrjunarliðinu til þess að halda öllum á tánum. Heiðar er því frábær viðbót við leikmannahópinn," segir Graham í viðtali við Watford Observer.

Heiðar meiddist í leiknum og það kemur í ljós á næsta sólarhring hvort hann verði klár í slaginn að nýju um helgina fyrir Íslendingaslag gegn Reading.