Hollenska utanríkisþjónustan í lið með InDefence

Ólafur Elíasson einn af forsvarsmönnum InDefence hópsins segist hafa verið boðaður á fund ásamt tveimur öðrum á ræðisskrifstofu Hollands fyrir skömmu. Þar áttu þeir fund með embættismanni frá sendiráði Hollands í Noregi sem er með málefni Íslands á sinni könnu. Eftir að hafa rætt við manninn virtist hann sannfærður um að hópurinn ætti að tala máli Íslands í Hollandi. Ólafur er nú þegar búin að ræða við hollenska sjónvarpsstöð og nú stendur til að hópurinn fái áheyrn hollenska þingsins.

Ólafur segir manninn hafa verið að kortleggja ýmis hagsmunamál varðandi Ísland og hafði hann aðallega áhuga á sjávarútvegi, landbúnaði og síðan Icesave.

„Það kom fljótt upp að hann hafði myndað sér þá skoðun að sú sorglega staða væri uppi að Ísland þyrfti að greiða fyrir Icesave," segir Ólafur en þeir félagar voru allt annað en samþykkir þessari skoðun mannsins.

„Við fórum þá í að útskýra fyrir manninum hversu kjánaleg hugmynd það væri að íslenskir skattgreiðendur þyrftu að greiða reikninginn fyrir þetta misheppnaða bankamál."

Ólafur segir að þegar búið var að fara yfir málið með manninum virtist hann verið orðinn alveg sannfærður. „Hann sagðist hvergi hafa heyrt þessi sjónarmið í hollenskum fjölmiðlum og hvatti okkur til þess að tala við fjölmiðla og hollenska þingið. Hann endaði síðan bara á því að óska okkur góðs gengis og kvaddi okkur með tilfinningaþrungnum baráttukveðjum og sagði bon courage," segir Ólafur en þeim félögum fannst þessi uppákoma óneitanlega hálf fyndin.

Ólafur gekk strax í málið og hefur í morgun rætt við hollenska fréttakonu og segir að nú standi til að biðja um áheyrn hollenska þingsins.

„Okkar sjónarmið eru meðal annars þau að langflestir íslenskir lögfræðignur telja að íslandi beri ekki skylda til þess að setja ríkisábyrgð á bak við innistæðutryggingar. Einnig liggja fyrir allavega þrjú lögfræðiálit frá virtum erlendum lögfræðistofum sem segja það sama. Það er okkar mat að fái menn tíma til þess að melta þessi rök, þá mun þetta snúast með okkur. Það er mjög mikilvægt að við gefum ekki frá okkur samningsstöðuna á síðustu metrunum. "