Ásmundur: Er mjög fúll með að tapa þessum leik

Þjálfarinn Ásmundur Arnarsson hjá Fjölni var eðlilega óhress eftir 1-3 tapið gegn Þrótti á Fjölnisvelli í kvöld en heimamenn voru með góð tök á leiknum nær allan fyrri hálfleikinn en var refsað fyrir að sofna á verðinum.

„Ég er mjög fúll að tapa þessum leik. Hvað á maður að segja. Við tvær afmælisgjafir til Þróttar missum við hausinn. Við eigum fyrri hálfleikinn frá a til ö en á síðustu sekúndunum erum við bara ekki á tánum og erum hættir og þeir skora ódýrt mark.

Snemma í seinni hálfleik færum við þeim svo annað mark á silfurfati með því að tapa boltanum á okkar vallarhelming. Í svona leik þar sem spennustigið er hátt fyrir þá halda menn bara ekki haus og því fór sem fór," segir Ásmundur.

Til þess að bæta gráu ofan á svart þá nældu Fjölnismenn sér í tvö rauð spjöld í síðari hálfleik. Gunnar Már Guðmundsson fékk tvö gul spjöld og þar með rautt og Ásgeir Aron Ásgeirsson fékk beint rautt fyrir tæklingu.

„Mér fannst seinna spjaldið vera verulega ódýrt og ég veit ekki hvað skal segja við fyrra spjaldinu. Gunnar Már sækir sér þarna tvö gul spjöld á stuttum tíma og ég veit ekki hvað fór almennilega á milli hans og dómarans en það var eitthvað sem fór mjög í taugarnar á honum.

Þetta er gríðarlega dýrt fyrir okkur á þessum tímapunkti. Við erum að fara í annan sex stiga leik í Eyjum næst og þá með tvo sterka menn í banni og það verður því erfitt," segir Ásmundur.