Gradi: Það sem gerðist fyrir Chelsea er frábært

Enska d-deildarfélagið Crewe, þar sem Guðjón Þórðarson er við stjórnvölin, hefur tilkynnt ónefnt úrvalsdeildarfélag til enska knattspyrnusambandsins vegna ólögmætra viðræðna þess við ungan leikmann Crewe.

Málið kemur í kjölfar þess að Chelsea var á dögunum dæmt í bann af FIFA fyrir að ræða ólöglega við samningsbundinn leikmann og Dario Gradi, yfirmaður knattspyrnumála hjá Crewe, segir tíma til kominn að stóru félögin fái að gjalda fyrir syndir sínar og lýsir yfir ánægju sinni með að Chelsea hafi verið gómað.

„Stóru félögin eru oft á tíðum að stela leikmönnum frá minni félögum. Það er ekkert öðruvísi. Minni félögin sitja eftir með sárt ennið og fá lítið sem ekkert fyrir sinn snúð þegar upp er staðið.

Ég lýsi hér með yfir ánægju minn með hvað kom fyrir Chelsea, það var frábært og nauðsynlegt. Ég vona að önnur stór félög séu núna skíthrædd og hugsi sig tvisvar um í framtíðinni. Það er engin afsökun fyrir því að brjóta reglurnar," segir Gradi.