Benitez: Ekki hægt að kaupa Torres fyrir allan heimsins pening

Rafael Benitez, stjóri Liverpool, var að sjálfsögðu sáttur með frammistöðu landa síns Fernando Torres um helgina en spænski landsliðsframherjinn skoraði glæsilega þrennu í 6-1 sigri Liverpool á Hull í ensku úrvalsdeildinni. Benitez ítrekaði líka enn á ný að Torres væri ekki til sölu.

Torres er nú markahæsti leikmaðurinn með átta mörk í fyrstu sjö umferðunum en þetta var fjórða þrenna hans fyrir Liverpool síðan að hann var keyptur frá Atletico Madrid sumarið 2007.

Benitez hefur sagt frá að nokkur félög hafi verið á höttunum eftir Fernando Torres í sumar og þó að hann hafi ekki nefnt þau lið á nafn er nokkuð víst að það hafi verið lið Manchester City og Chelsea.

„Hversu mikils virði er Torres? Þið mynduð segja að minnsta kosti 70 milljónir punda. Ég segi ekki að hann sé bestu í heiminum í dag en hann er ungur og getur orðið enn betri. Hann er einn af þeim bestu en ef hann vill það þá getur hann bætt sig," sagði Benitez.

„Það voru umboðsmenn að spyrja okkur í sumar hversu mikið við vildum fá fyrir hann en við sögðum að hann væri ekki til sölu. Á þessari stundu er ekki hægt að kaupa Torres fyrir allan heimsins pening," sagði Benitez.

Fernando Torres hefur leikið 64 leiki fyrir Liverpool í ensku úrvalsdeildinni og skorað í þeim 46 mörk. Hann er enn bara 25 ára gamall og er nýbúinn að framlengja samning sinn við Liverpool til ársins 2013.