Rafael framlengir við United

Brasilíski bakvörðurinn Rafael hefur skrifað undir tveggja ára framlengingu á samningi sínum við Englandsmeistara Manchester United.

Þessi 18 ára piltur hefur þótt fara vaxandi í vetur þar sem meiðsli þeirra Gary Neville og Wes Brown urðu þess valdandi að hann fékk að sýna hvað í honum bjó í byrjunarliðinu.

Rafael er nú samningsbundinn United fram til ársins 2013 en hann var einn þeirra sem tilnefndir voru sem besti ungi leikmaðurinn í úrvalsdeildinni í vetur.

"Allir hafa verið mjög ánægðir með Rafael í vetur og eru spenntir að fylgjast með honum í framtíðinni. Áhugi hans og kjarkur á leikvellinum eru kostir sem eru dæmigerðir fyrir leikmenn United og við erum allir ánægðir að sjá hann framlengja við félagið," sagði Alex Ferguson knattspyrnustjóri við þetta tækifæri.