Kvikmyndagerðarmenn keppa í kreppunni

Stuttmyndahátíð ungs fólks, Ljósvakaljóð, verður haldin í þriðja sinn í Norræna húsinu í Reykjavík 6. nóvember.

Hingað til hefur keppnin farið fram samhliða Alþjóðlegri kvikmyndahátíð í Reykjavík en ákveðið var nú að halda hana sér og gera stærri viðburð úr henni, að sögn Garðars Stefánssonar aðstandanda hátíðarinnar. Á þriðja tug stuttmynda tóku þátt í keppninni í fyrra.

Vettvangur framtíðarfólks í kvikmyndmyndagerð

,,Framtíðarsýnin er að Ljósvakaljóð verði vettvangur þar sem kvikmyndagerðarmenn stígi sín fyrstu skref og að verði nokkurs konar leiðarljós ungra og hæfileikraríkra kvikmyndagerðarmanna í átt að kvikmyndagerð," segir Garðar.

Á Ljósvakaljóði í ár verða meðal annars pallborðsumræður með þekktum innlendum kvikmyndagerðarmönnum. Ennfremur verða tvær keppnir haldnar. Annarsvegar stuttmyndakeppni þar sem keppt er um bestu mynd Ljósvakaljóða 2008 og hins vegar besta ,,pitchið." Pitch-keppnin er hugmynd sem sótt er til sambærilegra erlendra kvikmyndahátíða og felur í sér að fólk komi fram með mótaða hugmynd að stuttmynd, heimildamynd og/eða leikinni mynd.

Kryddað með náungakærleik í kreppunni

Aðspurður hvort hann telji að myndirnar í ár muni einkennist af fjármálakreppunni og neikvæðni segir Garðar: ,,Það er aldrei að vita. Myndirnar sem taka þátt í keppninni hverju sinni endurspegla oft það samfélagsmynstur sem við búum við hverju sinni. Vissulega ríkir mikið lægð yfir Íslendingum þessa dagana en ég vona þó að myndirnar í ár muni einkennast af smá vott af bjartsýni og ekki myndi skemma fyrir ef það yrði kryddað með smá náungakærleik. Það er vissulega hinn fullkomni menu fyrir ljósvakaljóð."

Verðlaunafé í alíslenskum krónum

Ljósvakaljóð er opin öllum þátttakendum á aldrinum 15 til 25 ára. Stuttmyndin má ekki vera eldri en 2 ára. Skilafrestur er mánudagurinn 3. nóvember. Veitt verða 75.000 krónu verðlaun fyrir bestu stuttmyndina og 20.000 krónur fyrir bestu pitch-hugmyndina.

,,Við vorum ekki nægilega fljótir að skipta yfir í evrur á sínum tíma," segir Garðar aðspurður hvort til greina hafi komið að hafa verðlaunaféð í evrum. ,,Vissulega má líta sérstaklega til þess fyrir næstu keppni, en í ár verður það blessuð krónan. Við vonum bara að hún verði ekki verðlausari í millitíðinni annars er það auðvitað heiðurinn sjálfur og sú viðurkenning sem fylgir því að vinna keppnina sem skiptir mestu."

Ljósvakaljóð er hátíð sem unnin er í samstarfi við Zik Zak kvikmyndagerð, dvoted.net og Reykjavíkurborg. Hægt er að kynna sér Ljósvakaljóð og skrá sig í keppnina hér.