Tekinn tvisvar á sama degi langt yfir leyfilegum hámarkshraða

Lögregla á Vestfjörðum hafði í gær tvisvar afskipti af ökumanni sem ók langt yfir leyfilegum hámarkshraða.

Fram kemur í dagbók lögreglunnar að maðurinn hafi verið tekinn á 122 kílómetra hraða skammt frá Ögri í Ísafjarðardjúpi um miðjan dag í gær. Nokkru síðar var hann svo stöðvaður í Staðardal á enn meiri hraða, eða 137 kílómetra hraða á klukkustund. Segir lögregla að af þessu megi ráða að fyrri afskipti lögreglunnar af ökumanninum hafi ekki vakið hann til umhugsunar um þá áhættu sem hann setti sjálfan sig og aðra vegfarendur í með hraðakstrinum.

Alls stöðvaði lögreglan á Vestfjörðum 24 fyrir hraðakstur í síðustu viku, en sá sem hraðast ók var á 150 kílómetra hraða á Kollafjarðarnesi en þar er hámarkshraði 90 kílómetrar á klukkustund. Þá mældust allmargir á yfir 120 kílómetra hraða á leiðinni um Staðardal.