Stöðugildum fjölgar ekki í samræmi við aukin verkefni

Fjölgun stöðugilda hjá lögregluembættinu á Suðurnesjum er í engu samræmi við fjölgun íbúa á svæðinu og farþega sem fara um Keflavíkurflugvöll. Þetta kemur fram í samantekt sem embættið lét gera og Vísir hefur undir höndum. Frá árinu 2004 hefur lögreglumönnum í fullu starfi fækkað um ellefu, þeir voru 94 fyrir fjórum árum en í ár eru þeir 83.

Á sama tíma hefur íbúum á svæðinu fjölgað um tæplega 4000, úr 16.953 árið 2004 en spá fyrir árið í ár gerir ráð fyrir 20.900 íbúum.

Tollvörðum hefur fjölgað um fjóra á tímabilinu. Hins vegar hefur umferð um Keflavíkurflugvöll aukist langt umfram það. Árið 2004 fóru um 1,6 milljón farþega um völlinn en spá fyrir árið 2008 gerir ráð fyrir að 2,4 milljónir manna fari um flugstöðina. Tollafgreiðslur aukast að sama skapi. Fyrir fjórum árum voru tollafgreiðslur rúmlega 119 þúsund en í ár er gert ráð fyrir 212 þúsund afgreiðslum.

Eina umtalsverða aukningin hjá embættinu er í öryggisvörslu í Leifsstöð. Öryggisverðir voru 40 árið 2004 en eru 99 í ár.