Sportbíllinn á ofsahraða fyrr um kvöldið

Ökumaður sportbílsins sem endaði á steinvegg við Rauðarárstíg um hálf tvö leytið í nótt hafði fyrr um kvöldið ekið á ofsahraða í miðbænum. Annar ökumaður varð vitni að akstrinum og tilkynnti til lögreglu.

Vísir sagði frá ökuferðinni í morgun sem endaði á steinvegg við Rauðarárstíg. Lögregla elti bílinn, sem er gulur opinn sportbíll, eftir að hann hafði verið að reykspóla á Laugaveginum. Ökumaðurinn sinnti því ekki og ók á ofsahraða upp Hverfisgötuna og hætti lögregla eftirförinni í öryggisskyni. Skömmu síðar lenti bíllinn á steinveggnum.

Þetta var um hálf tvö leytið í nótt. Annar ökumaður sem varð vitni að aksturslagi sportbílsins um 22:00 í gærkvöldi hafði samband við Vísi í kjölfar fréttarinnar nú í morgun. Segir hann tvennt hafa verið í bílnum sem keyrði á ofsahraða í miðbænum. Svo blöskraði honum aksturslagið að hann elti bílinn og tilkynnti til lögreglu.

Hafði sportbíllinn þá svínað á ökumanninn og segir hann augljóst að ekki hafi verið í lagi með ökumanninn. Þegar lögregla náði honum eftir eltingarleikinn kom í ljós að hann var undir áhrifum áfengis. Stúlka sem var farþegi í bílnum var flutt á slysadeild vegna eymsla í baki. Ökumaðurinn gistir nú fangageymslur.