Markaðssetja Ísland fyrir fjársterka ferðamenn

„Discover Iceland" nefnist átak sem miðar að því að vekja athygli American Express korthafa á sérstæðri náttúru og ferðamannastöðum á Íslandi.

Í fréttatilkynningu sem fjölmiðlum var send vegna átaksins segir að Discover Iceland verði kynnt milljónum American Express korthafa í Evrópu eftir hefðbundnum leiðum í beinni markaðssetningu. Kynningarefni verði sent korthöfum American Express víða í Evrópu þar sem tilboð á vetrarferðum til Íslands verði tíunduð og þeim boðið að upplifa allt það besta sem Ísland hafi upp á að bjóða, svo sem einstakar náttúruperlur, veitingastaði á heimsmælikvarða og einstök verslunartækifæri. Einnig verði opnaður sérstakur kynningarvefur um átakið sem verður aðgengilegur á ensku, rússnesku, frönsku, þýsku og ítölsku.

Um er að ræða samstarfsverkefni Borgunar, þjónustuaðila American Express á Íslandi, Icelandair og Kreditkorta, sem er útgefandi American Express korta á Íslandi. Haukur Oddsson, forstjóri Borgunar, segir í fréttatilkynningunni að það sé mikil ánægja að fá tækifæri til að taka þátt í þessu átaki og stuðla með því að fjölgun ferðamanna til Íslands á erfiðum tímum. Handhafar Amerian Express korta séu hvarvetna eftirsóttir viðskiptavinir, enda þekktir fyrir góð fjárráð og mikla kaupgetu.