Neitar aðild að pólsku mafíunni

Przemyslaw Plank, sem lögreglan á höfuðborgarsvæðinu handtók í kvöld vegna gruns um aðild að hrottalegu morði í Póllandi, segist vera saklaus.

Plank segir að hinn raunverulegi morðingi sé landi hans Slawomir Sikoro. Þetta kom fram í Kastljósi Ríkissjónvarpsins. Plank segist hafa verið tekinn sem vitni úti í Póllandi en síðan sem grunaður. Hann kveðst hins vegar vera saklaus og að honum hafi verið heimilt að koma hingað til lands. Plank segir að ætlunin hafi verið að fara til Póllands í sumar og hitta konu sína þar.

Í samtali við Kastljósið neitaði Plank því að eiga aðild að pólsku mafíunni. Hann segist aldrei hafa brotið lög á Íslandi og aldrei hafa haft í hótunum við aðra Pólverja sem búsettir eru hér á landi.