Bubbi er fljótfæri aðilinn í sambandinu - spáð í brúðhjón dagsins

Brúðkaup Bubba Morthens og Hrafnhildar Hafsteinsdóttur fer fram á Reynivöllum í Kjós í dag. Séra Pálmi Matthíasson gefur þau saman. Búast má við að brúðkaupið og veislan verði með glæsilegasta móti. Í tilefni dagsins kannaði Vísir samband brúðhjónanna út frá stjörnuspekinni.

Hrafnhildur Hafsteinsdóttir er fædd undir stjörnu vatnsberans en Bubbi Morthens tilheyrir stjörnu tvíbura sem segir að hér er um heiðarlegt og innilegt samband að ræða.

Þegar fram í sækir mun Bubbi eftirláta Hrafnhildi völdin því hann kann þá list að sóa ekki eigin orku í valdabaráttu og segir reyndar ekkert nema hann virkilega meini það.

Miklar andstæður birtast en þær eru af hinu góða og ýta undir sjálfstraust beggja aðila. Það er eins og Bubbi nærist á hlýju Hrafnhildar og ástaratlotum sem hún er svo sannarlega fær um gefa honum. Þannig losar hún eflaust um hömlur hans.

Sem einstaklingar elska þau frelsið en leita stöðugt uppi ævintýramennsku. Bubbi er án efa fljótfæri aðilinn í sambandinu sem er kostur og Hrafnhildur virðist hafa mikla þörf fyrir að læra og þroskast allt sitt líf.

Brúðhjónin hafa mörg spennandi járn í eldinum og þola vel álag því þau hafa tileinkað sér að vinna náið saman og fylgja hlutunum eftir með þrautseigju.

Sameinuð hafa þau hæfileikann til að skapa fagra framtíð.