Verkfærum fyrir milljónir stolið af byggingarsvæðum

Verkfærum fyrir margar milljónir króna hefur verið stolið af byggingasvæðum og úr nýbyggingum undanfarin misseri og hafa þau horfið sporlaust. Grunur leikur á að þeim sé smyglað úr landi.

Lögregla leitar nú tveggja manna sem brutust inn í íbúðarhús í Holtunum í Reykjavík undir morgun og stálu þaðan verðmætum rafmagnsverkfærum. Lögregla hefur greinargóða lýsingu á mönnunum sem hún telur að muni leiða til handtöku þeirra.

Mikið hefur verið um verkfæraþjófnað að undanförnu úr nýbyggingum og húsum sem verið er að gera upp, eins og í þessu tilviki, og telur lögregla að um skipulega starfsemi sé að ræða. Í fyrra fannst mikið af verkfærum í gámi sem átti að senda úr landi og leikur grunur á að viðlíka starfsemi sé enn í gangi.

Þá hefur lengi leikið grunur á að ýmsum öðrum varningi, einkum hljómflutningstækjum, skjávörpum og GSM-símum sé smyglað út landi en ekki hefur tekist að afla óyggjandi sannana um það. Það á bæði við um verkfærin og hljómflutningstækin að þrátt fyrir að miklu sé stolið af þessum hlutum virðast þeir hvergi vera til sölu sem gæti bent til útflutnings.