Jóhanna fær Barnamenningarverðlaunin

Jóhanna Sigurðardóttir félagsmálaráðherra hlýtur Barnamenningarverðlaun Velferðasjóðs barna í ár. Kári Stefánsson, forstjóri Íslenskrar erfðagreiningar og stjórnarmaður í sjóðnum, afhenti Jóhönnu verðlaunin við hátíðlega athöfn í Iðnó í dag. Þá var einnig úthlutað styrkjum til málefna er varðar börn fyrir alls um 8 milljónir króna.

Í tilkynningu segir að þetta sé í fjórða sinn sem Barnamenningarverðlaun Velferðarsjóðs barna eru veitt og í greinargerð frá fagráði sjóðsins kemur fram að Jóhanna hlýtur verðlaunin í ár fyrir framlag sitt til íslenskra barnafjölskyldna fyrr og nú. Jóhanna tók við veglegum verðlaunagrip úr silfri eftir Dýrfinnu Torfadóttur gullsmið.

„Í dag var einnig úthlutað styrkjum úr styrktarsjóði Velferðasjóðs barna. Hjálparstarf kirkjunnar og Mæðrastyrksnefnd hlutu hvort um sig kr. 2.000.000 sem ætlað er að kaupa föt og jólaglaðning fyrir börn. Foreldrahús hlaut einnig styrk upp á kr. 2.000.000 en Foreldrahús vinnur með börnum og foreldrum sem hafa átt við erfiðleika að stríða, líkt og einelti eða fíkniefnaneyslu. Dyngjan, áfangaheimili fyrir konur sem eru að koma úr meðferð, hlaut kr. 1.000.000 í styrk og verkefnið Morgunhanar fékk styrk upp á kr. 300.000 en verkefninu er ætlað að vinna gegn félagslegri einangrun og slakri mætingu í grunnskóla. Þá fékk Félag lesblindra einnig styrk upp á kr. 300.000 en alls hefur sjóðurinn styrkt félagið um kr. 4.500.000 undanfarin ár," segir einnig.

Ennfremur segir í tilkynningunni að frá því Velferðarsjóður barna var stofnaður af Íslenskri erfðagreiningu fyrir átta árum hefur sjóðurinn úthlutað meira en 450 milljónum króna til margvíslegra verkefna.