Óskað eftir gögnum um skattamál fyrrv. stjórnarformanns Baugs

Ríkislögreglustjóri mun í dag óska eftir því að ríkisskattstjóri afhendi gögn varðandi skattamál fyrrverandi stjórnarformanns Baugs, en Hæstiréttur úrskurðaði á fösudag og Ríkislögreglustjóra væri heimilt að gera húsleit hjá Ríkisskattstjóra til að ná í gögnin.

Ríkislögreglustjóri vakti athygli Ríkisskattstjóra á því í tengslum við rannsókn Baugsmálsins árið 2003 að svo virtist sem Óskar Magnússon, fyrrverandi stjórnarformaður Baugs, hefði fengið greiddar 118 milljónir króna á tímabilinu 1998 til 2000 sem ekki hefðu verið gefnar upp til skatts. Ríkislögreglustjóri taldi að mögulega væri um að ræða stórfelldan undandrátt frá opinberum gjöldum.

Minni háttar skattalagabrot fyrnast á sex árum en stórfelld brot á tíu árum. Þegar skattayfirvöld tóku á máli Óskars töldu þau stærstan hluta meintra brota vera fyrnd en endurálögðu á hann opinber gjöld vegna 25 milljóna vegna vantaldra tekna árið 2000.

Ríkislögreglustjóri telur hins vegar að brotin hafi verið stórfelld og fyrnist því á tíu árum og fór fram á að fá afhent gögn um Óskar frá skattinum sem Ríkisskattstjóri neitaði að afhenda. Þá var farið fram á húsleitarheimild sem Héraðsdómur samþykkti og Hæstiréttur staðfesti svo á föstudag.

Helgi Magnús Gunnarsson, saksóknari efnahagsbrota hjá Ríkislögreglustjóra, reiknar með að óskað verði eftir því að gögnin verði afhent í dag. Embættið mun síðan rannsaka hvort ástæða er til að gefa út ákæru vegna þeirra 95 milljóna sem standa út af borðinu þegar tillit hefur verið tekið til endurálagningar skattayfirvalda vegna áðurnefndra 25 milljóna.

Helgi Magnús segir að þetta mál verði skoðað í samhengi við önnur skattrannsóknarmál vegna Baugs og reiknar með á vormánuðum komi í ljós hvort ákærur verði gefnar út.