Innlent

Þrír vilja formannsstólinn í Framsókn

Frá flokksþingi Framsóknarflokksins árið 2005. Fremst eru: Páll Pétursson fyrrv. ráðherra, Steingrímur Hermannsson fyrrv. forsætisráðherra, Sigurjón Örn Þórsson þáverandi aðstoðarmaður ráðherra og Sæunn Stefánsdóttir núverandi ritari Framsóknarflokksins.
Frá flokksþingi Framsóknarflokksins árið 2005. Fremst eru: Páll Pétursson fyrrv. ráðherra, Steingrímur Hermannsson fyrrv. forsætisráðherra, Sigurjón Örn Þórsson þáverandi aðstoðarmaður ráðherra og Sæunn Stefánsdóttir núverandi ritari Framsóknarflokksins.

Þrír hafa ákveðið gefa kost á sér til formennsku í Framsóknarflokknum á landsþingi flokksins í janúar.

Valgerður Sverrisdóttir formaður Framsóknarflokksins tilkynnti í gær að hún ætlar ekki að sækjast eftir áframhaldandi setu á formannsstóli. Hún tók við af Guðna Ágústssyni þegar hann sagði af sér formennsku 17. nóvember. Guðni hafði þá verið formaður í rúmlega eitt og hálft ár.

Jón Vigfús býður sig fram til formanns

Í dag tilkynntu Höskuldur Þórhallsson, þingmaður, og Páll Magnússon, bæjarritari Kópavogs, um framboð sitt. Nú í kvöld barst þriðja tilkynningin um framboð. Jón Vigfús Guðjónsson, 39 ára einstæður sjómaður á Akureyri, gefur kost á sér sem næsti formaður Framsóknarflokksins.

Framsóknarflokkurinn er öfgalaus og fjölskylduvænn stjórnmálaflokkur, að mati Jóns. ,,Ég hef óbilandi trú á Framsóknarflokknum sem hefur þó átt í vök að verjast undanfarið en það er að mínu mati mest innanflokkserjur sem eru búnar að skemma fyrir okkur undanfarin misseri," segir Jón í tilkynningu.

Jón Vigfús Guðjónsson.

Virkur í flokksstarfi

Jón er fæddur og uppalinn í Suðureyri við Súgandafjörð, bjó lengi í Reykjavík en hefur undanfarin þrjú ár verið búsettur á Akureyri.

Jón hefur verið virkur þátttakandi í flokksstarfi Framsóknarflokksins. Meðal annars í Reykjavík og þá tók hann þátt í prófkjöri flokksins á Akureyri fyrir seinustu bæjarstjórnarkosningar. Jón skipaði 13. sæti Framsóknarflokksins í Reykjavíkurkjördæmi norður fyrir Alþingiskosningarnar 2007.

Flokksþing Framsóknarflokksins verður haldið 16. til 18. janúar í Vodafonehöllinni við Hlíðarenda. Birkir Jón Jónsson, þingmaður, hefur einn líst yfir framboði til varaformanns.








Tengdar fréttir

Valgerður hættir sem formaður í janúar

Valgerður Sverrisdóttir formaður Framsóknarflokksins ætlar ekki að sækjast eftir áframhaldandi setu á formannsstóli og mun hætta á næsta flokksþingi sem haldið verður í janúar. Þetta kemur fram í yfirlýsingu frá Valgerði á heimasíðu flokksins.

Tjáir sig ekki um formannsframboð

Siv Friðleifsdóttir þingflokksformaður Framsóknarflokksins hefur ekki tekið ákvörðun um hvort hún hyggist bjóða sig fram til formanns flokksins. Hún segir það ekki hafa verið á dagskrá hjá sér en Valgerður Sverrisdóttir núverandi formaður lýsti því yfir í dag að hún ætli sér ekki í formannsframboð.

Höskuldur íhugar alvarlega formannsframboð

Höskuldur Þórhallsson, þingmaður Framsóknarflokksins, íhugar alvarlega að gefa kost á sér sem formaður Framsóknarflokksins á komandi flokksþingi sem haldið verður í janúar.

Páll Magnússon býður sig fram til formanns Framsóknarflokksins

Páll Magnússon, bæjarritari í Kópavogi, hefur ákveðið að gefa kost á sér til formennsku í Framsóknarflokknum á landsþingi flokksins í janúar. Hann segir, í yfirlýsingu sem hann sendi frá sér fyrir stundu, að ákvörðunin sé tekin eftir samtöl við fjölmarga flokksmenn um stöðu flokksins og framtíð hans.

Mest lesið


Fleiri fréttir

Sjá meira


×

Mest lesið