Segir almenning fyrst og fremst líða fyrir mótmælin

Ingibjörg Sólrún Gísladóttir utanríkisráðherra segir það dapurlegt að horfa upp á átök eins og þau sem urðu á milli lögreglu og vöruflutningabílstjóra við Rauðavatn í morgun.

Hún segir mótmælin aldrei geta leitt til neinnar lausnar á málum. Þetta kom fram í hádegisviðtalinu á Stöð 2 í dag. „Ég furða mig á því að þau koma fyrst og fremst niður á almennum borgurum en ekki að angra stjórnmálamenn öðru fremur," segir Ingibjörg.

Ráðherra segir mjög mikilvægt að halda stofnæðum inn og út úr borginni opnum. Ingibjörg segist ekki hafa orðið vör við mótmælin í gær við Bessastaði og þau hafi ekki komið til tals í hádegisverðinum á Bessastöðum með Abbas.