Bónorð í Laugarásbíó - myndir

"Ég byrjaði að undirbúa bónorðið fyrir tveimur vikum. Keypti hringinn, hafði samband við aðstandendur myndarinnar og reddaði barnapíu," segir Arnbjörn Elíasson sem gerðist svo kjarkaður að biðja unnustu sinnar Marijönu Cumba sem er ættuð frá Króatíu á sérstakri frumsýningu Baðhússins á kvikmyndinni Sex and the City í Laugarásbíó í gærkvöldi

Arnbjörn lét útbúa stóra auglýsingu sem hann fékk birta rétt áður en kvikmyndin hófst þar sem á stóð stórum bleikum stöfum Viltu giftast mér Marijana? - og það fyrir fullum sal af fólki.

Vísir spurði Marijönu hvort hana hafi grunað að bíóferðin færi á þennan veg? "Nei alls ekki. En ég sá að hann var mjög stressaður rétt fyrir sýninguna. Ég spurði hann einmitt hvort hann væri nokkuð veikur."

"'Ég viðurkenni að ég var mjög stressaður. Ég svitnaði mikið og var mjög taugaveiklaður. En hún sagði já," segir Arnbjörn.

"Þetta var vel við hæfi. Við erum bæði miklir aðdáendur Sex and the City þáttanna. Við horfum oft á þá saman og höfum gaman af," segir Marijana himinlifandi.