Fyrrverandi framsóknarkona aðstoðar Ólaf Friðrik

Ólöf Guðný Valdimarsdóttir hefur verið ráðin aðstoðarmaður Ólafs Friðriks Magnússonar borgarstjóra. Þetta kemur fram í tilkynningu frá borginni.

Þar segir einnig að hún sé arkitekt að mennt og með próf í hagnýtri fjölmiðlun frá Háskóla Íslands. Ólöf Guðný var formaður Náttúruverndarráðs og Landverndar auk þess að vera stjórnarmaður í Umhverfisverndarsamstökum Íslands.

Ólöf Guðný hefur setið á Alþingi sem varaþingmaður Framsóknarflokksins í Vestfjarðakjördæmi en sagði sig úr flokknum vorið 2003. Þá segir enn fremur í tilkynningunni að Ólöf hafi starfað mikið að skipulagsmálum, sem skipulagsráðgjafi og þá var hún skipulagsfulltrúi í Akranesbæ.