Rektor Háskóla Íslands flutti erindi um loftlagsmál

Kristín Ingólfsdóttir, rektor Háskóla Íslands, flutti í dag erindi á alþjóðlegri ráðstefnu um loftslagsmál á vegum tækni- og vísindastofnunarinnar TERI í Indlandi.

Nóbelsverðlaunahafinn Rajendra K. Pachauri veitir stofnuninni forstöðu en hann tók við friðarverðlaunum Nóbels á síðasta ári sem forseti vísindanefndar Sameinuðu þjóðanna um loftslagsbreytingar (IPCC). Vísindanefndin hlaut sem kunnugt er friðarverðlaun Nóbels, ásamt Al Gore, fyrrum varaforseta Bandaríkjanna, fyrir baráttuna gegn loftslagsbreytingum af völdum manna.

Pachauri hefur verið á Íslandi í tvígang og veitti því þá sérstaka athygli hversu framarlega Háskóli Íslands er í rannsóknum á sviði jarðvísinda, umhverfis- og auðlindafræða og nýtingu endurnýjanlegra orkugjafa. Pachauri hefur flutt fyrirlestra hér, m.a. við vígslu Stofnunar Sæmundar fróða um sjálfbæra þróun við Háskóla Íslands og á aldarafmæli Landgræðslunnar.

Pachauri bauð rektor Háskóla Íslands sérstaklega til ráðstefnunnar en með því er rektor sýndur mikill heiður, ekki síst fyrir þær sakir að fjölmargir þjóðarleiðtogar og pólitískir áhrifamenn víða um heim munu flytja erindi á ráðstefnunni. Á meðal þeirra eru Ólafur Ragnar Grímsson, Anders Fogh Rasmussen, forsætisráðherra Danmerkur, Manmohan Singh, forsætisráðherra Indlands, Jens Stoltenberg, forsætisráðherra Noregs, Matti Vanhanen, forsætisráðherra Finnlands, Moritz Leuenberger, fyrrum forseti Sviss.