Yaris hefur hækkað um 30% á innan við mánuði

Framkvæmdastjóri Bílgreinasambandsins segist ekki vita hvort bifreiðaumboðin í landinu muni standa af sér það efnahagsfárviðri sem nú skellur á þjóðinni. Hann segir að bílar hafi hækkað all verulega í verði að undanförnu. Reksturinn sé mjög erfiður enda séu sum umboðin með tugi ef ekki hundruð starfsmanna í vinnu. Umboðin þurfi að standa undir launakostnaði og öðrum kostnaði, eins og önnur fyrirtæki.

Verð á bifreiðum hefur hækkað um tugi prósenta að undanförnu. Sem dæmi má nefna að verð á ódýrustu gerð af Toyota Yaris hefur hækkað úr 1790 þúsund krónum í tæpar 2,6 milljónir króna, samkvæmt upplýsingum frá Félagi íslenskra bifreiðaeigenda. Þetta þýðir hækkun um 30% frá því í nóvember.

Özur Lárusson, framkvæmdastjóri Bílgreinasambandsins, segir að ástæðuna fyrir bílverðshækkunum megi rekja til hás tollagengis. „Málið er að þessir bílar sem koma hingað til lands og eru hérna við hafnarbakkann eru flestir löngu komnir hingað til lands," segir Özur. Hann bendir á að þeir hafi komið í sumar, þegar staðan á krónunni hafi verið allt önnur. Bílarnir hafi verið greiddir til framleiðanda þá, í sumum tilfellum með lánum. „En þegar þessir bílar eru seldir í dag eru þeir sóttir niður á höfn og þá miðast tollgengið við gengið í dag," segir Özur.

Özur segir að töluverður fjöldi ótollafgreiddra bifreiða liggi niðri við höfn, líklegast á bilinu 4-5 þúsund bílar. Hann segir að þetta geri rekstur bílaumboðanna þungan. „Þetta er bara ósköp einfalt dæmi. Ef þú ert að reka sjoppu og það kemur enginn í sjoppuna að þá gengur dæmið ekki upp," segir Özur. Hann vill að tollagengið verði fest á einhverjum ákveðnum stað, til dæmis í líkingu við það sem það var í sumar.