Sóley eykur breiddina í borgarstjórnarflokknum

Þorleifur Gunnlaugsson, borgarfulltrúi Vinstri grænna, segir að það sé starfsregla að báðir borgarfulltrúar flokksins og 1. varaborgarfulltrúi séu viðstaddir fundi borgarstjórnar flokksins. Með því sé verið að auka breiddina í borgarstjórnarflokknum.

Borgarfulltrúar Vinstri grænna hafa hlutfallslega oftast kallað til varamenn í sinn stað á fundi borgarstjórnar Reykjavíkur, það sem af er ári, ef miðað er við fjölda þeirra í borgarstjórn. Svandís Svavarsdóttir og Þorleifur Gunnlaugsson, borgarfulltrúar VG, hafa 21 sinni kallað inn varamenn til að koma inn í sinn stað.

Sóley Tómasdóttir 1. varaborgarfulltrúi Vinstri grænna tekur í sama streng og Þorleifur. Hún segir að með því að kalla til varaborgarfulltrúa á hvern fund og fjölga þannig fulltrúum flokksins á fundinum megi stuðla að auknu lýðræði. Þá bendir hún jafnframt á að borgarfulltrúar flokksins kalli hana til í sinn stað vegna þess að þeir telji hana búa yfir ákveðinni þekkingu sem geti gagnast á borgarstjórnarfundum.

Sóley vekur sérstaka athygli á því að 1. varaborgarfulltrúi sé á föstum launum hjá borginni, sem hækki ekki þrátt fyrir að fulltrúinn sé kallaður á fundi borgarstjórnar. Það leiði því ekki af sér aukinn kostnað þegar að hún er kölluð inn sem varamaður.