Hitti hetjuna sína í Hollywood

Ágúst Bjarnason kvikmyndaleikari sem er vinna verkefni í Hollywood sá sjálfan Robbie Williams á dögunum. Þá var hann ásamt tveimur vinum sínum, Helga Má Erlingssyni og Jóni Hjálmarssyni, staddur á karoke kvöldi á Saddle Ranch í Hollywood.

,,Ég hef gaman að karaoke og tek alltaf Angels með Robbie Williams. Við æfðum það heima og lögðum svo af stað á Saddle Ranch um áttaleytið. Þegar við komum á svæðið þá fengum við borð á meðan við biðum eftir að það kæmi að okkur," segir Ágúst og greinilegt er á honum að þetta hefur verið mikil upplifun.

Ágúst segir að stuttu seinna hafi verið ýtt í öxlina á sér og þrír menn viljað komast framhjá. Þeir hafi svo staðið við borðið og verið að tala í símann þegar Helgi segi svo allt í einu að Robbie Williams sé staddur þarna. „En við Jón hlóum bara. Svo sjáum við að þarna er enginn annar en Robbie Williams ásamt tveimur vinum en hann býr hérna rétt fyrir ofan okkur," segir Ágúst. Hann segir að Helgi, vinur sinn, hafi svo að sjálfsögðu upp myndavélina og beint henni að Robbie við litla hrifningu hins síðarnefnda.

Ágúst segist svo hafa fengið tækifæri til að syngja Angels. ,,Þetta var allt mjög súrealískt en svona er Hollywood. Þessari ótrúlegu tilviljun trúir náttúrulega enginn maður og því er ég feginn að Helgi ýtti á rec þó það hafi verið í stuttan tíma," segir Ágúst.