Jón Baldvin og Bryndís Schram björguðu íslenskum ferðalangi

Hafrún Kristjánsdóttir sálfræðingur komst í hann krappan þegar hún festist á flugvelli á Alicante. Henni til happs voru þau hjónin Jón Baldvin Hannibalsson og Bryndís Schram á flugvellinum. Þau komu Hafrúnu til bjargar þegar öll sund virtust lokuð.

"Það var bara allt í klessu," segir Hafrún sem var á leiðinni til Granada að halda fyrirlestur. Áður en hún lagði í ferðina hafði hún sótt um nýtt ökuskírteini á Íslandi. Skírteinið var ekki tilbúið í tíma og því fékk hún pappíra hjá lögreglunni sem bráðabyrgðarskírteini. Þeir pappírar voru ekki teknir gildir þegar hún hugðist leigja sér bíl á flugvellinum á Alicante.

"Ég fór á milli lögreglustöðva og reyndi allt sem ég gat til að koma þeim í skilning um að þetta væru gildir pappírar en allt kom fyrir ekki," segir Hafrún. Á bloggi sínu segist hún hafa rölt um flugvöllinn gjörsamlega miður sín. Hún hafi verið full örvæntingar og ákveðið að setjast niður.

Þá sér hún Bryndísi Schram og Jón Baldvin og lýsir upplifuninni svona: "Ég hef held ég aldrei á ævinni verið jafn fegin að sjá kunnugleg andlit. Ég vippaði mér upp að þeim og sagði: Þið verðið að afsaka að ég ræðst svona á ykkur en getið þið hjálpað mér."

Sem þau og gerðu. Hafrún segir að Jón Baldvin hafi beitt öllum sínum kröftum til að sannfæra lögregluna um að pappírar hennar væru gildir en löggan hafi verið ótrúlega hörð. "Ég hugsa að Ingibjörg Sólrún hefði ekki náð að bjarga þessu," segir Hafrún og hlær.

"Svo buðust þau til að skutla mér til Granda - sem væri svona eins og að skutla manni til Akureyrar," segir Hafrún. Til þess kom þó ekki því Hafrún segir að Bryndís hafi fundið út hvernig hún kæmist með flugi til Granada um morguninn, útvegað henni hótel á Alicante og svo hafi þau keyrt hana á hótelið.

"Ég ber þeim miklar þakkir fyrir þetta. Ég var í algjörri desperasjón og þau komu mér til bjargar," segir Hafrún en óförum hennar var þó ekki lokið. Þegar hún loks kom til Granada keyrði leigubílstjórinn hana á vitlaust hótel!

Hafrúnu tókst þó að mæta í tíma á eigin fyrirlestur um hugræna atferlismeðferð í heimilislækningum og er nú komin heim til Íslands heil á höldnu. Ferðasögu hennar sem ber nafnið - Ferðalag dauðans - má lesa hér.