Ásdís og Kolfinna hættar saman

„Jú, þetta er rétt. Alveg ótrúlega sorglegt að mínu mati,“ segir Ásdís Olsen en sjónvarpsþættinum Mér finnst hefur verið hætt á ÍNN-sjónvarpsstöðinni í núverandi mynd. Þær Ásdís og Kolfinna Baldvinsdóttir munu nú stjórna sitthvorum þættinum, Kolfinna verður á miðvikudagskvöldum með samnefndan þátt. Ásdís mun hins vegar halda Mér finnst-nafninu þótt þátturinn verði ekkert í líkingu við það sem áhorfendur þekkja til.

Fréttablaðið greindi frá því í maí á þessu ári að uppúr hefði soðið milli Ásdísar og Kolfinnu í beinni útsendingu. Meistari ljósvakans, Ingvi Hrafn, bar klæði á vopnin og sagði við það tilefni að Mér finnst væri flaggskip sjónvarpsstöðvarinnar. Hann hefur nú siglt því höfn og tekið það í sundur. Enda sé það ekki við hæfi að borga fólki fyrir sínar pólitísku skoðanir. Ásdís tekur hins vegar skýrt fram að þær Kolfinna hafi grafið stríðöxina. Og að hún eigi eftir að sakna samstarfskonu sinnar.

Undir þetta tekur Kolfinna. En hún hefur verið áberandi í þeim mótmælum sem fram hafa farið niður á Austurvöllum. Hún segir það ósköp skiljanlegt að svona skuli hafa farið. „Það lá í augum uppi að ég gæti ekki fengið borgað fyrir að sitja í sjónvarpsal og halda pólitískar ræður. Núna fæ ég bara að vera með minn eigin þátt. En án allra launa,” segir Kolfinna.