Fékk 300 þúsund kall í verðlaun

"Ég fékk glæsilegt leiregg eftir Koggu. Og 300.000 kall. Ég var búinn að lofa Lufsunni að kaupa nýjan stofusófa ef ég fengi 500.000 svo ekkert verður af því. Það er allt í lagi því gamli sófinn er alveg nógu góður," svarar Dr. Gunni eftir að honum voru formlega veitt Íslensku neytendaverðlaunin við hátíðlega athöfn á Grand Hóteli fyrr í dag.

"Nei nei, ekki hrærður kannski en voðalega þakklátur. Það var bara nokkuð sniðugt hjá honum Bjögga pönk að láta mig hafa svona verðlaun."

"Ég var nú aðeins byrjaður á power point showinu og búinn að búa til fyrstu glæruna sem var mynd af lítilli kók. Svo nennti ég ekki meiru og skrifaði bara smá ræðu í staðinn. Ég veit nú ekki þetta með "maður fólksins", en það er ágætt að leggja sitt af mörkum til að Ísland verði jafnvel enn æðislegri staður en það er. Og hann verður það ef maður getur farið út í búð án þess að vera alltaf á nálum yfir því að það sé verið að taka mann í bakaríið," segir Dr Gunni sem flýgur til Serbíu á vegum Fréttablaðsins 18. maí næstkomandi.