Voffi hætt komin vegna kæruleysis veiðimanna

„Hann er allur að hjarna við," segir Ómar Örn Jónsson eigandi hundsins Tinna, sem í gær var skorinn upp eftir að hafa innbyrt öngul og girni í veiðiferð á föstudaginn. Öngullinn festist í maga hundsins, og girnið lafði niður í þarma. Gera þurfti opna aðgerð á kviðarholi Tinna til að fjarlægja veiðifærin.

Tinni er bara átta mánaða gamall og var þetta hans fyrsta veiðiferð. Öngulinn gleypti hann fyrir utan veiðihús í Veiðivötnum. „Það hefur örugglega einhver verið að flýta sér heim," segir Ómar. Hann þekkir dæmi þess að menn séu hættir að þora að fara með hundana sína í veiði, þar sem veiðimenn kasti önglum og girni frá sér án þess að velta afleiðingunum fyrir sér.

„Það er mikilvægt að beina þeim tilmælum til veiðimanna að ganga vel frá og taka með sér allt sem þeir eru með. Ekki skilja eftir öngla eða girni neinsstaðar," segir Sif Traustadóttir dýralæknir á Dýralæknamiðstöðinni í Grafarholti. Tinni er annar hundurinn á nokkrum dögum sem skera þarf upp þar eftir að hafa gleypt öngul. „Önglar geta stungist í gegnum þarmavegginn og af því getur hlotist lífhimnubólga sem er lífshættuleg," segir Sif, og bætir þvi við að girnið sé ekki síður hættulegt. Það særi þarmana og geti valdið lífshættulegum stíflunum. Sif segir heimilisdýr ekki þau einu sem geti hlotið skaða af þessu. Mörg dæmi þess að viltir fuglar drepist af því að innbyrða girni.

„Það vildi svo heppilega til í báðum þessum tilvikum að eigandinn tók eftir því að það stóð girni út úr munninum á hundinum og vissi að hann hefði gleypt öngul," segir Sif. Því hafi verið hægt að fylgjast með því hvort önglarnir og girnið skiluðu sér með náttúrulegum hætti og bregðast við þegar það gerðist ekki. „Þetta getur verið hættulegt ef fólk tekur ekki eftir þessu og veit ekki af því fyrr en hundurinn er orðinn fárveikur."