Ökumenn hundrað bíla aðstoðaðir í morgun

Á Suðurnesjum er unnið að því að losa bíla á Sandgerðisheiði, Garðvegi, við Vogaafleggjara, á leiðinni til Hafna og víðar. Færð hefur verið afar slæm en er eitthvað að lagast en bílar sitja fastir þvers og kruss innanbæjar, í öllum hliðargötum. Allt tiltækt lið björgunarsveitanna er nú úti og hafa aðstoðað ökumenn um 100 bíla í morgun. Félagar úr 4x4 klúbbnum á Reykjanesi hafa einnig aðstoðað samborgara sína í morgun, samkvæmt fréttatilkynningu frá Landsbjörgu.

Fyrir austan fjall hafa björgunarsveitir haft í nógu að snúast en búið er að loka Hellisheiði og Þrengslum. Björgunarsveitir eru búnar að koma nær öllum bílum af heiðinni en í Þrengslum situr enn mikið af fólki fast í bílum sínum og unnið er að því að koma því til byggða. Búist er við að því verki ljúki um hádegisbil en björgunarsveitir af höfuðborgarsvæðinu hafa verið kallaðar út til aðstoðar á svæðinu. Þrátt fyrir að Hellisheiði hafi verið lokað ákváðu nokkrir ökumenn að leggja á heiðina og sitja þeir nú fastir í Kömbunum.

Ekkert ferðaveður er á Suðurlandi að sögn björgunarsveitamanna, mikill skafrenningur og skaflar sem ná upp fyrir vélarhlíf á stórum breyttum bílum.

Björgunarsveitir á Akranesi og Borgarnesi hafa einnig verið kallaðar út vegna ófærðar.

Á sjötta tímanum í nótt var Björgunarsveitin Týr frá Svalbarðseyri kölluð út til að losa rútu sem var föst í austanverðu Víkurskarði. Átta manns voru í bílnum.